Luze jo du Areson udal taldea berritzeko prozesuak, baina bi hauteskunde deialdi, hamaika bilera eta estutasun momentu batzuen ondotik, udalaren kudeaketaz arduratuko den taldeak hartu du erreleboa. 2023ko maiatzeko hauteskundeetan ez zen hautagairik aurkeztu, azaroan errepikatu zituzten hauteskundeak eta Aulki zuriak alderdiak hautagaitza aurkeztu bazuen ere, ez zuen gutxieneko babesa lortu. Herritarrei kudeaketa batzorde bat osatzeko bidea eman zien orduan Nafarroako Gobernuak. Sei laguneko taldea osatuta, urtarrilean aurkeztu zuten proposamena Lurralde Kohesiorako departamentuan eta ia lau hilabeteren ondoren lortu du taldeak gobernuaren izendapena.
Apirilaren 30ean egindako batzarrean onartu zituzten karguak eta bakoitzaren lan esparruak maiatzaren 23an egingo duten batzarrean zehaztuko dituzte.