GIZARTEA

Sunbillako inauteriak ortziraletik igandera ospatuko dira

Baserri eta karrikako eskearen ondotik, igandeko karrozen desfile ikusgarriarekin borobilduko dira

Sunbilla | 2012-01-26 | 09:12 | Testua: TTIPI TTAPA | Argazkia: Artxiboko argazkia

Sunbillako inauteriak ere gainean ditugu eta urtarrilaren 27tik 29ra, ortziraletik igandera ospatuko dira. Batzuk ortziral goizean hasiko dute inauteri-besta, baserriz baserri egiten den itzuliarekin. Larunbatean karrikan ibiltzeko txanda izanen da. Eta gehienentzat, herritar zein bisitarientzat, igandeko desfileak bereganatuko du atentziorik gehien.

Urtarrilak 27, ortzirala

09:00etan gazteek gosaria izanen dute Itturburun. Ondotik, bi taldetan banatu eta baserrietara joanen dira, Modesto eta Jose Angel akordeoilariarekin. Bazkaria Ixtola eta Exkernekobordan izanen dute. 17:00etatik 20:30era herriko haurrentzako txokolate beroa eta musika izanen da Agerralde akordeoilariarekin frontoian. 21:30ean eskean dabiltzan gazteen afaria eginen da Ariztigain kanpalekuan. Gauean, emakumeen afaria Ulibeltzak Elkartean eta ondotik Dja.

Urtarrilak 28, larunbata

10:00etan gosaria eginen da Itturburu ostatuan. Gero, herrian eskean ibiliko dira Modesto eta Joxe Angelekin. 14:00etan, eskean dabiltzanentzat bazkaria izanen da Fondan. 17:00etatik 21:00etara umeentzako berendua eta musika izanen da Agerralde akordeoilariarekin Ulibeltzak Elkartean. Gauean gazteek afaria izanen dute Elor-txurin.

Urtarrilak 29, igandea

11:30ean karrozen desfilea abiatuko da eta opilak, gaztainak, hezur salda, tortilla eta ardoa banatuko dira ikusleen artean. Gero, behin ibilaldia bukatutakoan, zerria eta bildotsaren zozketa eginen da. 14:30ean, bazkaria Ulibeltzak Elkartean eta inauteriak akitzeko, dantzaldia Jalisko Band taldearekin.